Randai Harimau nan Salapan_5

Gurindam	:	Bajalan Tuanku Nan Batigo, Bajalan bairiang-iriang, manuju Koto Tuo. Alah sarantang pajalanan, cukuik katigo rantang panjang. Alah tibo garan di sinen, iyo di Surau Koto Tuo Kirono urang lah rami bana, elok di danga baritono
Adegan	:
Tuanku Nan Ba Tigo	:	Assalamu’alaikum Warahmatullah..
Tuanku Nan Tuo	:	Wa’alaikum Salam Warahmatullah.. Tuanku Bajangguk Itam, Tuanku Nan Renceh, Tuanku Pasia, lai basamo. Alhamdulillah, basyukur ambo tuanku lai datang. Pucuak di cinto ulam tibo, sumua dikali aia datang. Duduaklah tuanku.
Tk Nan B 3	:	Insya Allah, Subhanallah..
Adegan	:	Rapek dibukak dek Tuanku Nan Tuo
Tk. N Tuo	:	Assalamu’alaikum Warahmatullahi Wabarakatuh.. Alhamdulillahirabbil ‘alamin. Hamdan katsiran kama amar. Asyhadual laa ilaaha illahllah, Wahdahula syarikalah. Waasyhaduanna Muahammadan ‘abduhu wa rasuluh. La nabiya ba’dah, amma ba’du. Niniak mamak, alim ulama, tuan-tuan cadiak pandai, sagalo nan tibo. Marilah kito samo-samo maucap syukur kapado Rab sekalian alam Allah SWT nan indak hanti-hanti no mambarikan rahmat jo nikmat kapado kito basamo. Shalawat jo salam kito kapado junjuangan Nabi Besar Muhammad SAW. Allahuma shalli ‘ala Muhammad wa ‘ala aali Muhammad. Tuan-tuan nan dirahmati Allah.. Kito lah lamo badakwah mambari pangajaran kapado dunsanak, anak kamanakan, jo urang kampuang. Namun, jauah pintak dari bari, hasil no alun mamadai. Tantangan banyak tibo dari urang badarah putiah, urang asali, katurunan rajo-rajo di nagari awak, sabagian datuak-datuakpun ado pulo nan bapucuak bulek, sarato para parewa nan kareh angok. Untuak itu, a jalan nan ka kito tampuah? A usaho nan ka kito jalankan? Iko kami nak mintak pandapek ka bakeh kito basamo. Hanyo sakito pamuloan kalam dari ambo, kini ambo minta kapado Tuanku Bajangguk Itam dari Kamang. Wassalamu’alaikum Wr.Wb
Tk.B. Itam	:	Assalamu’alaikum Warahmatullahi Wabarakatuh,. Alhamdulillah wa syukurilah, sagalo puja jo puji hanyo taruntuak bagi Allah Ta’ala.. Shalawat jo salam kapado nabi, . Allahuma shalli ‘ala Muhammad wa ‘ala aali Muhammad. Tarimo kasih ambo Tuanku Nan Tuo,. Angku-angku niniak mamak, tuanku-tuanku alim ulama, imam jo khatib sarato cadiak pandai nan dimuliakan Allah Ta’ala. Sungguahpun nan diutarokan Tuanku Nan Tuo cako, amatlah barek tangguangan nan kito para ulama pikua. Patangguang jawaban nan akan dijawab di hadapan Allah di Padang Masyhar kelak, Insya Allah.. Kito manjawek warih dari nabi “Al ‘ulama warisatul anbiyak..” wajib hukumno bagi kito manjalankan amar ma’ruf nahi mungkar sarato mambari pangajaran mampabaiaki akhlak manusia. Dek karano itu, mari kito nan basamo ko basatu, bapacik-pacik an tangan, satu jo nan lain. Mari kito badakwah mambari pangatahuan parihal hukum syari’at, mari kito bajihad maantian kamungkaran-kamungkaran nan tajadi jo sagalo kabijakan nan ado pado kito.
Para hadirin	:	Subhanallah, sasuai.. sasuai..
Tk. B. Itam	:	Talabiah takurang, salah jo jangga, denai mintakan maaf. Wassalamu’alaikum Wr. Wb.
Para hadirin	:	Wa’alaikum salam warahmatullah..
Tk. N. Tuo	:	Lah samo kito danga pandapek Tuanku Bajangguk Itam, kini marilah kito danga pulo pandapek dari Tuanku Nan Renceh
Tk. N. Renceh	:	Assalamu’alaikum Wr. Wb Alhamdulillah wa syukurilah, sagalo puja jo puji hanyo taruntuak bagi Allah Ta’ala.. Shalawat jo salam kapado nabi, . Allahuma shalli ‘ala Muhammad wa ‘ala aali wa asbihi ajma’in. Amma ba’du.. Lamak siriah lega carano Lamak kato ba lega bunyi Kini mamintak kapado ambo Sapanjang kaji Tuanku Bajangguk tu, itulah kato sabano no, sasuai bana jo pandapek denai. Apo sabab no dek mangko itu? Nabi kito bapasan dalam sabuah hadist:         نه فبلسا  يستطع  لم  ن  فا  ه  بيد  ه فليغير  منكرا  ى أ ر من . الايمان ٠رواه مسلم        أضعف  وزلك   فبقلبه  يستطيع  لم  وان   Man ra a minkum mungkaran falyugayyirhu biyadihi fainlam yastathi'ak fabilisanihi wainlam yastathi'ak fabiqalbihi wazaalika adh'aful iymani. Rawahul Muslim Aratino: Apabilo engkau mandampak kamungkaran mako rubahlah jo tangan engkau, kalau tiada dapat dengan tangan, mako ubahlah jo lisan engkau, kalau ndak juo dapek jo lisan doh, mako rubahlah dengan hati engkau. Mako maubah jo hati tulah nan salamah-lamah iman. (hadist diriwayat an Imam Muslim) Tuanku sarato angku-angku sakalian,. Marilah kito bapadoman kapado hadist nabi tu, kalau kapado anak jo kamanakan kito, tantu mungkin dapek maubah jo tangan. Aratino tantulah jo lidah nan indak batulang ko ditambahi jo  kakuatan juo sagalo kamungkaran ko dapek habih  pado urang kampuang wak tu. Salanjuk no, marilah kito labiah giat an pangajian pado tiok-tiok surau. Satantangan diri ambo, walau angok-angok ikan, walau ka jiwo-jiwo patuang, nan bana akan ambo tagak an juo. Walau a nan ka tajadi, walau batuhuak jo baparang, ambo indak takuk tantang itu. Sagitu di ambo nan takana, pulang maklum ka nan rapek. Wassalamu’alaikum Wr.Wb
Tk. N. Tuo	:	Tarimo kasih tuanku, lah samo-samo kito danga pandapek dari tuanku nan baduo ko. Kini ba a pulo pandapek di kito nan basamo ko. Marilah para tuanku, kamukokanlah pandapek tuanku. Ba di Tuanku Lintau?
T. Lintau	:	Sasuai bana kami jo tuanku nan baduo ko, tuanku..
T. Nan Tuo	:	Di Tuanku Pandai Sikek ba pulo ka bakeh tuanku?
T.P.Sikek	:	Subhanallah tuanku, kamipun baitu juo..
T. N. Tuo	:	Tuanku Galuang ba a pulo ka bakeh tuanku?
T. Galuang	:	Insya Allah kamipun baitu juo tuanku
T. N. Tuo	:	Tuanku Mansiang kito danga pulo..
T. Mansiang	:	Insya Allah Tuanku, samo kiro no
T. N. Tuo	:	Tuanku Ladang Laweh, mandanga pulo kami
T. L. Laweh	:	Alhamdulillah Tuanku, lah bana di tuanku nan baduo
T. N. Tuo	:	Ba a pulo di Tuanku Sungai Pua?
T.S.Pua	:	Bana tuanku, Insya Allah
T. N. Tuo	:	Tuanku jo angku-angku nan hadir dalam sidang hari ko. Pandapek kito basamo lah samo-samo kito danga. Rasono kitolah sapakat, bulek lah buliah digolek an, picak lah buliah dilayangkan. Karano itu marilah kito nan basamo manjalankan mufakat hari ko di nagari kampuang masiang-masiang. Talabiah ta kurang, kami pintakan maaf, Wassalamu’alaikum Wr. Wb