Randai Harimau nan Salapan_9

Pangajian di Surau Taluak

Gurindam	:	Hari Sinayan di hari itu Lah rami urang di Surau Taluak Nan di bukik datang manurun Nan di lurah datang mandakiKaji bamulai anyo lai Elok didanga baritono
Adegan
Tk.B.Hitam	:	Assalamu’alaikum Warahmatullahi Wabarakatuh.. Alhamdulillahillazi arsala rasulahu bilhuda wadinil haq Liyuz hirahu ‘aladdini kulihi wa kafa billahi syahida Asyhaduan laa ilaha illallah, wahdahula laa syarikalahu Wa’asyhaduanna Muhammadan ‘abduhu warasuluh la nabiyaa ba’da ‘amma ba’du. Angku-angku, inyiak-inyiak, tuan-tuan, amai-amai, kaum muslimin kaum muslimat nan hadir pado majelis pangajian kito hari ko. Puji sarato syukur kito haturkan ke hadirat Allah SWT nan salalu malimpahan rahmat jo nikmat kapado kito basamo. Dimano hati kito basamo masih digerakkan untuak datang ka surau kito ko untuak malakukan pangajian pado hari nan baiak ko. Angku-angku, inyiak-inyiak, tuan-tuan, amai-amai, kaum muslimin kaum muslimat nan dimuliakan dek Allah Ta’ala. Pamuloan kaji, marilah kito dangaan sapenggal firman Allah Ta’ala dalam Surah Al Maidah ayat ka 90: Yaa.. aiyuhallazi na’amanu innamal khamru wal maisiru wal anshabu wal azlamu rijsum min ‘amalishaiithan fajtanibuhu la ’allakum tuflihun. Aratino: Hai orang-orang nan bariman, sasungguahno minum khamar atau tuak, berjudi, bakurban untuak barhalo, mangundi nasib dengan anak panah adolah perbuatan keji, termasuk kepada perbuatan keji, termasuk perbuatan syetan maka jauhilah perbuatan-perbuatan itu agar engkau mendapat keberuntungan.. Angku-angku, inyiak-inyiak, tuan-tuan, amai-amai, kaum muslimin kaum muslimat nan dirahmati Allah.. Allah Ta’ala lah nan cipta an manusia, dijadikan khalifah di ateh bumi ko, mako sairiang jo nan baitu dikaluanlah dek Allah Ta’ala barbagai macam paraturan nan tadapek dalam Syari’at nan tacantum di dalam Al Qur’an sarato Hadist rasua. Tujuan sagalo paraturan itu iolah supayo sakalian manusia ko salamat hiduk no dunia sarato jo akhirat. Pado ayat nan kami sabuk an di ateh Allah Ta’ala malarang maminum khamar atau tuak bahaso awak no, indak itu sen doh, nan sabangso jo kahamar atau tuak itupun dilarang. Misal kini nan balaku pado babarapo nagari iolah candu nan didatang an dek urang kapia ka nagari wak di Minangkabau ko. Ba a mangko Allah Ta’ala malarang nan tun wahai Angku-angku, inyiak-inyiak, tuan-tuan, amai-amai, kaum muslimin kaum muslimat sekalian? Ndak kami jalehanpun kito nan basamo lah faham, aka ilang, nafsu gadang, parangai bakurang, bahkan sampai ka kubua gai dimasuak an urang. Satantang jo judi apo pulo? Harato abih, pangana ndak ado, wakatu tabuang, awak manjadi pamaleh sabab handak kayo sacaro capek indak amuah bausaho. Salain itu lawan batambah, aka buruak manjadi mainan, kawan nan elok manjadi manjauah, iduk badunsanak manjadi ranggang, apolai iduk barumah tanggo. Kasam kusumat capek mandatangi, iduklah ndak tanang dek lawan batambah juo. Bakurban untuak barhalo, iko manyabab an manusia manjadi pandia. Mamintak ka urang alun tantu ka dapek, apolai maminta ka benda mati atau makhluk nan indak jaleh. Kalau ka mamintak tu ka Allah Ta’ala, bukan ka jin panunggu batang baringin, atau dan sabangso jo itu. Hilang sagalo amalan kalau kito alah mangakui kekuatan lain selain dari kekuatan Rabb nan mancipta an wak Allah Ta’ala. Angku-angku, inyiak-inyiak, tuan-tuan, amai-amai, kaum muslimin kaum muslimat,. Maundi nasib, tanuang mananuangm, silau manyilau, takok-takok garih tangan, galah salapan, ramalan bintang, tajul muluk itu kasadono iolah permainan syetan. Indak ado satu makhlukpun di alam dunia ko nan dapek mancaliak ka maso nan ka tibo. Allah Ta’ala nan punyo kuaso ateh tu, Allahlah nan awal jo nan akhir.. Nabi kito parnah mambari nasihat: Apobilo ado urang nan datang kapado Kahin atau dukun mako indak ditarimo shalatno salamo 40 hari. Dan apobilo wak no picayo jo a nan dikicek an dukun tu mangko samo kirono urang tu lah maingkari a nan dibao oleh Nabi Muhammad SAW yaitu al Qur’an. Mako hilanglah sakalian amalan no sasudah tu, di akhirat wak no mandapek karugian. Jadi kito basamo masti hati-hati dalam pakaro ko, sado nan balaku di ateh dunia karano kahandak Allah Ta’ala samato. Paliharolah diri awak, paliharolah anak bini, paliharo pulo kamanakan sarato kaum karabat awak. Samoga kito masamo salalu barado dalam patunjuak jo linduangan Allah Ta’ala. Wassalamu’alaikum Warahmatullahi Wabarakatuh..  Angku-angku, inyiak-inyiak, tuan-tuan, amai-amai, kaum muslimin kaum muslimat marilah kito dangaan pulo kaji dari tuanku kito Tuanku Nan Renceh.
Tk.N.Renceh	:	Assalamu’alaikum Wr.Wb Alhamdulillah, asyhaduanla ilaha illallah, wa asyhaduanna Muhammadan ‘abduhi warasuluh. La nabiya ba’da, ‘amma ba’du. Puji sarato syukur kito haturkan ke hadirat Allah SWT nan salalu malimpahan rahmat jo nikmat kapado kito basamo. Shalawat sarato salam taruntuak nabi kito Muhammad SAW nan mambao palito nan manarangi sakalian alam. Angku-angku, inyiak-inyiak, tuan-tuan, amai-amai, kaum muslimin kaum muslimat nan dimuliakan Allah Ta’ala.. Satantang kaji nan disampai an Tuanku Bajangguk cako, sungguah banyak nan dapek kito ambiak. Tingga di kito, ka diamalkan atau indak itu Allah Ta’ala nan mangatahui. Angku-angku, inyiak-inyiak, tuan-tuan, amai-amai, kaum muslimin kaum muslimat,. Ambo mandapek kaba babarapo pangulu sarato ahli kerajaan di Batu Sangka lah mamintak bantuan kapado Si Kapia Bulando. Ndak talok di urang-urang tu mahadok i awak makono ka urang kapia wak no bapaliang. Benteng kito nan di Nagari Pandai Sikek lah dirabuk, tigo urang ulama kito lah syahid sarato jo baborapo pangulu nan bapihak ka kito.. Angku-angku, inyiak-inyiak, tuan-tuan, amai-amai, kaum muslimin kaum muslimat,. Iko kaji nan tapandang dalam adat kito, mambao urang lua masuak mancikaraui kito nan sadang basangketa. Masalah nan sadang tajadi di Alam Minangkabau ko mastino disalasaian dek urang Minang. Kini dek lah bantuak tu singkek aka urang-urang nan mangaku katurunan urang badarah putiah, urang asa tu mako paralu kito ma ambiak tindakan. Bulando iolah si kapia, haram bagi wak kalau bakawan jo urang kapia tu. Kini sabagian urang Malayu tu lah bakawan jo urang kapia tu. Ndak ado alasan, ndak ado tenggang manenggang lai. Angku-angku, inyiak-inyiak, tuan-tuan, amai-amai, kaum muslimin kaum muslimat Mari kito bajihad fisabilillah, Allah Ta’ala lah manjamin bagi sia sen nan mati syahid dalam perang membela agama Allah mako wak no akan masuak sarugo. Mari kito patahankan nagari kito, mari kito tagakkan agamo Allah di tanah Minangkabau ko.
Nan Hadir	:	Allahu Akbar, bajihad kito Tuanku..
Tk.N.Renceh	:	Alhamdulillahirabil’alamin.. Wassalamu’alaikum Wr Wb
Nan Hadir	:	‘Alaikum salam Wr.Wb